Fa’agaoioiga/Pulea
E tatau ona manino alafua e vave iloa ai pe a tulai mai tulaga ua a’afia ai i faiga fa’asolitulafono fa’amaumauga ma aseta fa’ateknolosi a le pisinisi. E tāua fo’i le manino o ta’iala e fa’amau lelei ai i lalo mea e tutupu, atoa ai ma le tali atu i ai pe a tula’i mai, fa’apea fo’i gaoioiga e fa’atino ina ia taofi ai le sosolo o le fa’afitauli i isi aseta po o fa’amaumauga e le’i a’afia. Ia manino fo’i le ta’iala e fofo ai le fa’afitauli ua tula’i mai ma, a mo’omia le toe fa’afoi o le aseta po o fa’amaumauga i lona tulaga sa iai ae le’i tula’i mai le fa’aletonu. E tāua fo’i le manino o se ta’iala o gaoioiga e toe siaki pe tuliloa ai le mataupu pe a ma’ea uma la’asaga e pei ona taua i luga ina ia:
- Fa’amau lelei ai le mea na tupu, ma ia fa’ailoa i e uma e ono a’afia i le mea na tupu (e aofia ai vaega nei o le pisinisi: vaega o le Tulafono, vaega o lo o nafa ma mataupu tau fa’alauiloa, po o le va i fafo a le pisinisi,vaega e nafa ma mataupu tau i le aufaigaluega, atoa ai ma isi vaega e i fafo atu o le pisinisi e aofia ai vaega e nafa ma le fa’atinoga o le Tulafono e pei o le Ofisa o Leoleo, atoa ai ma le aufainusipepa ma le aufa’asalalau, ma ofisa e nafa ma le mata’ituga o le fa’agaoioiga o lea ‘itu’aiga pisinisi. Ae le gata i lea o e o lo o fa’aaoga le auaunaga po o fa’ataua oloa mai lau pisinisi, fa’apea e e sapalaia oloa po o auaunaga mo lau pisinisi. Aua foi ne’i galo, pa’aga a lau pisinisi).
- Ia manino i ta’iala ma alafua itu’aiga fa’amaumauga e mo’omia le fa’amau lelei e pei o taimi na tupu ai lea mea ma lea mea, o le fa’avasegaga o itu’aiga fa’amaumauga ‘ese’ese na a’afia, ma vaega o le aotelega o fa’amaumauga/aseta fa’atekonolosi a le pisinisi na a’afia, ma isi itu fa’apena.
- Ia manino meafaigaluega ma tomai e mo’omia ina ia fesoasoani i le fa’agaoioiga ma le pulea lelei o le tali atu pe a tupu mai ni fa’aletonu fa’apenei. E iai polokalame fa’atekonolosi e mafai ona tu’u i masini a le pisinisi e faigofie ai ona pu’e pe tuliloa mea na tutupu ina ua tula’i mai le fa’aletonu.
E mafai ona fa’atino nei tulaga uma e se vaega o le pisinisi, ae e mafai fo’i ona filifili se isi e fa’apitoa lona tomai i fafo atu o le pisinisi, mo taimi e tula’i mai ai fa’aletonu fa’apenei.
Lipoti
Ia manino po o ai totonu e tatau ona lipoti pe fa’iloa i ai pe a tupu mai se fa’aletonu, e fua i le ogaoga o le mea ua tupu. A fa’ailoa foi e tatau ona aofia i le lipoti aloaia le mea ua tupu, pe fa’apefea ona tula’i mai, o ona a’afiaga, atoa ai ma mea ua fai/po o fai e fa’aleleia ai le mea ua tupu.
E mafai ona faia sa’o le lipoti i le tagata e ao ona logo i ai, ae e mafai fo’i ona fa’aaoga feso’otaiga fa’atekonolosi e logo ai. E fua le auala e fa’aaoga, i le tele o le pisinisi ma pe lava mea e tua iai le pisinisi ae maise i le maualuga o lo o iai puipuiga fa’atekonolosi a le pisinisi, aua le fa’atinoga o nei gaoioiga ‘ese’ese.
Ia manatua e fua fo’i i le ‘itu’aiga auaunaga po o oloa o lo o fa’atau atu e lau pisinisi, atoa ai ma le ituaiga fa’aletonu ua tupu (pe ogaoga pe leai) ia tagata po o fa’alapotopotoga e ao ona logo. E iai isi fa’afitauli e lava a le logo o tagata i totonu o le pisinisi, ae e iai foi taimi e tula’i mai ai fa’aletonu e ao ai ona logo tagata i fafo atu, ona o a’afiaga.
Tuliloa
A mae’a, ma ua fo’ia le fa’aletonu na tula’i mai, e tatau ona fai lelei se ‘ilo’iloga aloa’ia e tuliloa ma fa’amautu lelei ai mea na tutupu ma toe poupou ai vaiva’iga (po o se sasi a se tagata, po o se vaivaiga i masini, po o polokalame faatekonolosi o lo o fa’’aaoga e masini) ua alia’e. E aogā fo’i le taimi lea e fua lelei ai a’afiaga o le pisinisi ona o le mea na tupu ma fa’atulaga ai loa faiga e alofia ai le ono toe tula’i mai o se isi mea fa’apea i le lumanai.