Pe fa’apefea ona galue ‘itua’iga puipuiga fa’aopoopo nei
E tele auala ma polokalame fa’atekonolosi ‘ese’ese o lo o i ai e mafai ai ona maua puipuiga fa’aopoopo e pei ona ta’ua. Mo se fa’ata’ita’iga e iai polokalame fa’atekonolosi fa’apitoa e pei e loka ai se feso’ota’iga, fa’ata’ita’iga o se imeli, ona fa’atoa lafo ai lea. Ae o le tagata o lo o lafo i ai le imeli, e i ai fo’i le polokalame fa’atekonolosi o lo o i lana masini e iai le ‘ki’ e tatala ai le imeli lea na ‘loka’ muamua lafo atu ai. O le puipuiga fa’aopoopo lea, e loka i le tasi itu, ae o le ki la e i le masini a le tagata o lo o lafo iai le feso’otaiga. O lona uiga afai e le o ia oe le ‘ki’ sa’o, e le mafai ona e tatala le ‘loka’ lea e puipuia malu ai le imeli po o se isi ‘itu’aiga feso’ota’iga, po o fa’amaumauga fo’i.
E fua le ‘itu’aiga puipuiga fa’aopoopo i le tulaga ma’ale’ale/fa’aete’etegata o fa’amaumauga po o feso’otaiga o lo o fia puipuia. A matuā ma’ale’ale o lona uiga e tatau ona si’i le tulaga o le puipuiga fa’aopoopo e fa’aaoga.
E tāua puipuiga fa’aopoopo fa’apenei aua e fa’amausalī ai le sa’o o le fa’amaumauga po o le feso’ota’iga o lo o fetūfaa’i pe lafo mai se tasi, i se isi. E aogā fo’i e fa’amaonia ai le tagata o lo o lafo mai ai, ma le tagata o lo o lafo iai. Ia alu ai le feso’ota’iga po o le fa’amaumauga i le tagata tonu e tatau ona oo iai.
E aogā fo’i ‘itua’iga puipuiga fa’aopoopo fa’apenei mo fefa’ataua’iga e fai i luga o le initaneti. E alofia ai le ‘au gaoi, le ‘au oso fa’alava, ma le ‘au faitatala a e leai sa latou feau i le fefa’ataua’iga o lo o fa’atino.
FIlifiliga o ‘itua’iga Puipuiga Fa’aopoopo
O le fa’aogaga e le faigata tele. Ae e iai taimi e ono fa’afaigata ai le amataga, pe afai o lea fa’atoa tu’u le polokalame fa’atekonolosi i le masini/po o masini lea o le a fa’aaoga ai. O le faigata ma le faigofie o le la’asaga muamua lea, e fua i le tomai ma le nafatia e masini ma polokalame fa’atekonolosi o lo o fa’aaoga e le pisinisi po o le fa’alapotopotoga.
O le mea lea e tāua ai lou su’esu’e lelei i ‘itua’iga puipuiga fa’aopoopo o lo o i ai, ma filifili le ‘itua’iga e fetaui ma lau pisinisi ma mea o le a fa’aaoga ai.E leai se mea e leaga ai le fesili mo se fautuaga po o se fesoasoani mai se isi i fafo atu o le pisinisi e lava le malamalama ma le tomai i lea vaega. E le aoga i le vala lea lou taumate. E tāua le mautinoa.