O mea e ono tutupu
- Gaoia, pe leiloa, pe kopi ae leai se fa’atagaga e se isi o fa’amaumauga/aseta o lo o i luga, po o teu i masini e mafai ona feaveai (pei o laptop, tablet, telefoni feaveai, ma masini e mafai ona sulu iai se USB).
- Ave pe lafo sese fa’amaumauga e ala i se imeli.
- Tu’u sese o fa’amaumauga i luga o se Upega Tafa’ilagi, po o se ‘ftp’ po o le ‘cloud’ (o auala ‘ese’ese ia e mafai ona teu ai fa’amaumauga/aseta fa’atekonolosi).
- Lolomi sese fa’amaumauga e le tatau ona lolomia.
- Ave ese fa’asolitulafono fa’amaumauga i luga o se CD po o se DVD.
- Ave fa’anana/gaoia o fa’amaumauga e se isi o le aufaigaluega o le a tu’ua le pisinisi, a lē mo le fa’aaoga sese, pe mo le fa’atau atu i se isi ona o le ita o le tagata faigaluega i se isi i le pisinisi, po o le pisinisi.
Puipuiga o Fa’amaumauga
E tele auala e mafai ona puipuia ai fa’amaumauga:
- Fa’atino se ‘ilo’iloga e sa’ili ai po a vaivaiga o lo o i ai e afāina ai le malupuipuia o fa’amaumauga. E tatau ona siaki lelei mea ‘ese’ese uma o lo o mafai, po o teu ai fa’amaumauga a le pisinisi e aofia ai ma le network a le pisinisi, po o le cloud, faapea foi i masini ‘ese’ese. E tāua fo’i le manino po o ai e mafai ona tatala, pe fa’aaoga nofoaga ‘ese’ese o lo o teu ai fa’amaumauga fa’atekonolosi a le pisinisi atoa ai ma a’afiaga pe a leiloa nei fa’amaumauga.
- Ia manino lelei se ta’iala e fa’avasega ai fa’amaumauga ‘ese’ese ina ia manino ai po o a itu’aiga puipuiga e mo’omia mo lea ‘itu’aiga, ma lea ‘itu’aiga, fua i le ma’ale’ale po o le tāua o ‘itu’aiga fa’amaumauga, ae maise a’afiaga pe a leiloa, pe fa’aaoga sese.
- Ia taumafai ina ia i ai pa puipui talafeagai ina ia aua ai nei so’ona fa’aaoga e tagata e le tatau ona fa’aaoga’ itua’iga fa’amaumauga, fua i le fa’avasegaga e pei ona ma’ea ona fa’atino e pei ona ta’ua i luga.
- Fa’atulaga ma fa’amalosia faigafa’avae ma ta’iala manino mo le aufaigaluega ina ia limata’ita’ina ai le fa’atinoga o a latou galuega pe afai o lo o latou fa’aaoga pe a’afia i a latou galuega fa’amaumauga ma’ale’ale e mo’omia ai le fa’aeteete. E tatau ona fa’atino ni a’oa’oga talafeagai mo le aufaigaluega i nei tulaga uma.
- Fa’amatala ma fa’atonu lelei le aufaigaluega i fa’aeteetega uma e ao ona silasila i ai ina ia mata’ala i taimi uma. Fa’amanatu i ai e vaai fa’alelei ina ia aua ne’i so’ona kopi imeli i isi tagata e le tatau ona va’ai/faitau i fa’amaumauga o lo o i feso’otaiga ‘ese’ese.
- Fai ni aia’iga, pe matuā fa’asā le fa’aaoga o masini e mafai ona feavea’i āua e tele ai le avanoa o le gaoia po o le ave sese o fa’amaumauga ma aseta fa’atekonolosi a le pisinisi.
- Taumafai ina ia aveesea le mafai ona fa’aaoga o USB i masini ‘ese’ese.
- Fa’amanino lelei se faigafa’avae e te sau a oe ma aumai la oe masini e fa’aaoga i le galuega po o le BYoD (Bring Your Own Device).
- Ia faia puipuiga fa’aopoopo mo fa’amaumauga ma aseta fa’atekonolosi e patino i le fa’agaoioiga o le pisinisi.
- E iai polokalame fa’atekonolosi e fuafua mo fa’alētonu e pei o le leiloa o fa’amaumauga, pe puipuia ai mai le leiloa o fa’amaumauga po o aseta fa’atekonolosi. E lelei fo’i le va’ai pe fa’atau se polokalame fa’apea mo le pisinisi.