O le toatele lava o tagata e fa’aaogaina nei nofoaga, e moni ma fa’amaoni mea o lo’o latou tusi maia. ma le mafua’aga ua latou fa’aaogaina ai le site. Ae e ui i lea, e iai lava tagata leaga, ma ia e iloa ona puipui oe ma au tupe, pe a e feiloa’i i tagata i luga o le upega tafailagi.

O mea e ono tutupu

O le le malu pe a e fetaui i se tagata na lua mafuta i le upega tafailagi.
O le mulimulita’i mai ma fa’afefe oe.
O le taufa’afa’asese pe a tauanau oe ina ia e fesoasoani atu i se ‘fa’aletonu ua tupu’ ia te ia e aImeli taufa’asesela lea i le avatu o se tupe.
O se tagata fai mai o ia o se isi tagata.
O imeli taufa’asese, aemaise i mea tau evaga.
O le fa’afefe o oe e ala i le pu’eina o ni mea sa e faia i luma o le mea pu’eata o lau komepiuta ina ia maua tupe.
O imeli pepelo fai mai o lo’o lafo mai i se nofoaga mo evaga (dating site) e fa’aoso oe e lafo atu ni mea tau ia te oe lava.
O le fa’aseseina o oe e ala i lou fa’aaogaina o nofoaga fai mai o i latou o nofoaga mo evaga (dating sites).
O le ono gaoia lea o au tupe pe a e le fa’aaogaina se feso’ota’iga malupuipuia e totogi ai se mea.

Fa’aaogaina o nofoaga le fa’amaoni e:

Fai ai sau profile (mea tau ia te oe) e le moni, ma ua e masalosalo o le tagata o lo’o lua feso’ota’i o lo’o faigaluega i lea nofoaga e ta’ita’ina sese oe …ma totogi atu tupe.
Latou te maua loa au tupe ua totogi atu, ona le toe feso’ota’i mai loa lea.

Ia mulimulita’i i fautuaga nei ina ia e malu i evaga i luga o le upega tafailagi.

O le faiga o lau profile e te eva ai: ia puipui i mea tau ia te oe lava

Ia e lilo. Filifili se igoa fa’aaoga e le iloa ai oe e tagata. ‘Aua le fa’aaogaina lou fa’ai’u po’o se isi lava mea e iloa ai oe e tagata, e pei o le mea e te faigaluega ai.

Manatua, afai e te fa’aaogaina igoa e matua fa’atosina tele, e ono mulimuli mai ai, ma lama oe e tagata leaga.
Ia malu mea tau ia te oe lava. Ia fa’aeteete i le fa’amatu’u atu o so’o se mea. Aua le ta’uina mea tau ia te oe, e pei o lou tuatusi i le fale, o lau imeli, po’o lau telefoni foi i lau (profile) po’o feso’ota’iga muamua lava. Ia fa’asolosolo malie ma ia ta’u ni mea i isi tagata, pe a e lagona ua tatau ai. E matua le mafai lava ona e toe maua mai ni mea e te fa’amatu’u atu pe a e toe mana’o ai.
Ia taofia vave feso’ota’iga ma tagata e taumafai lava ia maua atu mea tau ia te oe po’o au tupe, pe taumafai foi e fai se togafiti e avatu ai. Afai e tupu lea tulaga, ia fa’afeso’ota’i loa ma ta’u i tagata latou te fa’afoeina lea nofoaga o evaga, ina ia malu oe ma isi tagata.

Upu tatala (Password) & Malupuipuia.

Ia fa’aeteete pe a e taumafai e te ulufale i lau account mai i se nofoaga po’o se komepiuta faitele, ina ia aua nei iloa e nisi lau upu tatala po’o ni mea tau ia te oe.
Ia e fa’aeteete i le tatala o mea e aofia i totonu o se imeli (attachments) mai i se tagata fa’ato’a e feiloa’i iai.
Ia e fa’amautinoa o lo’o fou ma (up to date) uma au faila e puipuia ai oe.

Feso’ota’iga ma tagata fou i luga o le upega tafailagi.

Ia fa’amautinoa lou iloa lelei o tagata, ma fa’amoemoe i lagona e o’o mai ia te oe (instincts). Ia fa’aeteete ma ia e iloa lelei se tagata, ae e te le’i feso’ota’i atu iai i fafo atu o le nofoaga o evaga (dating site). E iai meli ma talatalanoaga i nei nofoaga, ma e mafai ona e iloa lea tagata i se nofoaga ma se auala e va’ava’aia ma pulea. O nei ‘au’aunaga e fai ina ia malupuipuia ai oe. Fa’aaoga le latou puipuiga. Afai e te mana’o e fa’asoa atu se tuatusi o sau imeli, mafaufau pe tatau ona fa’ata’ita’i muamua se tuatusi e le iloa e nisi.
O nisi taimi e te fiafia ai i se tagata, e ono puaoa lou mafaufau tonu i lagona malolosi. Ia fa’aeteete pe a e talanoa e uiga ia te oe. E le tatau ona so’ona ta’uina fua mea e uiga ia te oe aemaise i se taimi muamua fa’ato’a e iloa ai se isi. E lava lava le taimi e talanoa ai i nisi tulaga pe a lua masani pea. Ia mafaufau tonu ma su’esu’e atili.
E iai le mea e gata ai le iloa o le kamupami e fa’afoeina ia evaga i luga o le upega tafailagi, i se tagata e te lua fa’amasani. E le mafai ona latou siakiina ni soligatulafono a tagata uma, ma o isi tagata e fa’aletonuga lava tusa pe le solitulafono. O le mea la, aua le fa’ase’eina gofie oe i le tagata lua te fa’amasani – ia fai ni au su’esu’ega muamua ma ia e filifili lelei, ae e te le’i malie lua te feiloa’i. Siaki po’o le tagata lea o lo’o i luga o le Facebook, ma po’o iai nisi mea tau ia te ia i luga o le upega tafailagi, ma siaki le Google image po’o iai ni ona ata.

O le mana’o mai i tupe, e ta’u mai ai le fa’aletonu.

O le a le mea o le a vave mana’o mai ai lea tagata i se tupe e te lua le’i masani, pe fa’ato’a lua feiloa’i foi? E leai se mafua’aga tatau e mana’o mai ai fua i au tupe po’o tusitupe, tusa po’o le a se mea leaga ua tupu ia te ia. Ia malupuipuia ma ia ia te oe lava au tupe. Afai e tupu le tulaga lea, ia fa’amuta loa le lua feso’ota’iga ma ia lipoti loa i le nofoaga i le upega tafailagi mo evaga (dating site).

Ia lipotia aga e le fetaui pe masalomia

E leai se isi e tatau fua ona onosa’ia amio le taupulea ma taufa’afefe i luga o le upega tafailagi, e pei lava ona masani ai i isi nofoaga e pei o falepia ma fale’aiga. Fa’alogo i ou lagona ma ia taofia loa le feso’ota’i ma se tagata e te le fiafia iai pe oso ai ni ou popolega. Aua le ma e lipoti se fa’afitauli e tupu mai i evaga fa’apea. O lena e te fesoasoani iai i le tagata lea, aemaise foi o isi. Ia e matapoto ma ia e malutia pea. O le eva ma se tagata fou o se tulaga fiafia i masaniga fa’apea, ae ia e fa’aeteete lava i taimi uma. Tusa pe e te lagona ua mafana le lua mafutaga i le imeli ma le telefoni, ia e manatua o le mea moni lava o lenei tagata o se tagata e ese mai ia te oe. O le mea lea, e taua lou fa’aeteete pea pe a lua mua’i feiloa’i tino, tusa lava pe na fa’a -tasi pe fa’a – lima na lua eva i luga o le upoega tafailagi. Manatua mea nei:

Ia fuafua. Ia tautala ai. Ia fai loa. O lau evaga. Ia lua malilie fa’atasi i le aoga ma le mea e maua mai ai, ae e te lua le’i feiloa’i. Aua le una’ina oe lua te feiloa’i ae e te le’i sauni iai, mo se taimi e te malie iai – o se feiloa’iga muamua e manaia pe a pu’upu’u.
Ia lua feiloa’i tino, ma eva ai i se nofoaga faitele, o se fuafuaga e malupuipuia lava lea. Ia su’e lou auala i le lua feiloa’iga ma toe foi mai lava i lou auala lena. Aua ne’i una’ina oe e te lua o fa’atasi i le fale. A ua e sauni e te lua o i se mea na o oulua, ia tutusa mea e te lua malilie iai.
Ia e iloa lelei le tagata lea, ae le na o mea o tusi i lana profile. E le tutusa lou iloa o se tagata i mea e tusitusia ma lou feiloa’i lelei iai. Aua e te ita pe a fa’apea e le maliegofie le tagata lea i se mea.pe a lua feiloa’i, pe o le leai foi o se alu i luma o le lua mafutaga.
E le o alualu lelei le lua feiloa’iga? Ia fa’anoi ma alu’ese loa. Aua le popole fua i le fa’apu’upu’u o se evaga pe a e le o fiafia ai. E leai se mea e tatau ona e faia mo ia tusa lava pe ua leva ona lua talanoa.
Afai e te’i ua fa’amalosi oe, o lo’o iai le fesoasoani. Po’o le a lava le mea e tupu, o le fai aiga fa’amalosi ae e te le mana’o ai, o le solitulafono. O leoleo ma fa’alapotopotoga o le alofa, e fesoasoani ma lagolago ia te oe.

O le fo’ia o tagata taufa’asese

O se fa’anoanoaga tele, e iai tagata peisea’i e lelei ae le lelei. O nofoaga o evaga ma isi nofoaga i le upega tafailagi, e fa’aleaga e tagata taufa’asese. E tasi lave le mea e manana’o ai, na o au tupe. O nisi nei o amio a tagata nei ia mata’itu ma lipoti:

O le folafola o lona alofa – Afai e folafola mai se alofa o se tasi mo oe i ni nai itula, aso, po’o vaiaso, ia e fa’aeteete. E tatau ona e iloa lelei se isi ona e alofa lea iai. O le fa’ailoa ae le’i masani lelei, e ta’u mai ai o lo’o taumafai le tagata e ia o’o mai i lou olaga mo ni mafua’aga sese. Mafaufau lelei ma ia fesili i sau uo mo sona manatu.
Mana’o i se tupe – E tatau ona e matua popole pe a tupu le tulaga lea. O tagata taufa’asese e su’e lava ma fa’aaoga se tala e fa’amatala ina ia e alofa atu ai.
O se isi e ofo atu ni tupe mo oe – O ai e ofoina ni tupe mo nisi i se nofoaga o evaga (dating site)? O se mea taufa’asese, e pei lava o auala sese (schemes) e ofo mai e vave mau’oloa ai tagata. Pau le tagata e mau’oloa ai i au tupe o le tagata taufa’asese.
Taufa’afefe ma le taufa’amata’u – o ni upu e le lelei, ae o isi ua latou fa’afefe tagata ina ia maua tupe e ala i le fai iai o le a fa’aali ata po’o vitio o le tagata lea, o lo’o ia i latou i luga o le upega tafailagi.

Fautuaga e fo’ia ai tagata taufa’asese

Aua aua lava le tali i se mana’o mo se tupe.
Ia fa’aeteete i ni tala e te alofa ai i se isi. E pei o le fia sau e va’ai oe ae mana’omia se tupe e totogi ai lona pasese po’o lona visa. Po’o se tagata o lona aiga ua ma’i ma e mana’omia se tupe e totogi ai le pili o le falema’i.
E tutusa a ma ni mea mananaia ua latou iloa ae ma’imau lava pe ana iai sana tupe e totogi ai i le taimi lea…Ia fa’aeteete i se tagata fai mai sa i le ami, po’o se isi fai mai fa’ato’a maliu lona to’alua ina ia e alofa atu ai ia te ia.
Aua le avea le taimi umi ma le mafutaga e fa’aseseina ai oe. O nei ituaiga mafutaga e fa’asolosolo malie lava ma e ono maua ai le taimi e te talitonuina ai ma fa’atauaina le tagata o lo’o oulua mafuta. Afai o se tagata pepelo, e le avea le umi o lea taimi mafuta e fa’aititia ai lona pepelo.
E fa’apea foi i mana’oga vave mo se tupe i se taimi pu’upu’u. O se tagata e mana’o ia te oe e uaea atu se tupe ia te ia, e le o se tagata lelei.
Ia fa’aeteete i mafutaga va va mamao. E le o se auala e amata ai se mafutaga e i’u lelei, aemaise i luga o le upega tafailagi.
Va’ai po’o le tagata o oulua mafuta e le mafai ona fa’afeso’ota’i, pe iai foi se mea e te masalosalo e le o fetaui: e pei o tagata o lo’o aumai numera mai isi atunu’u, po’o tagata e le o iloa mea o tutupu i lou atunu’u, po’o tagata foi e feso’ota’i mai i ni itula le fetaui. Ia fa’aeteete pe a o se tagata e le tautala sa’o pe manino i se mea, pe le o mafaufau sa’o foi ma toe fai lava le tala e tasi i taimi uma. E ono le mana’o lea tagata lua te feiloa’i ma e le tali sa’o mai foi i au fesili. O sipelaina o ana upu feso’ta’i mai e le o sa’o.
Aua le fa’amatu’uina atu ni ou ata (ma ata o nisi) po’o nisi mea e ono pulea ai e lea tagata oe. O lou olaga ma mea e te faia, ia na o oe lava e te iloa vagana ua e matua iloa ma talitonuina le tagata lea.
Afai e fa’afefe oe e se tagata ina ia avatu ni tupe, aua. E saga fai ai pea lena amio. Ia e lipotia tusa pe e te le mana’o e fai. E iai ‘au a leoleo e osofa’ia tagata taufa’asese. Tu’u iai le avanoa e puipui ai oe ma isi.
Aua le fefe e fesili i sau uo. E faigata ona maua lou mafaufau tonu pe a ua mafana le mafutaga. A iai se mea e te masalomia aemaise lava o tupe, ia fesili i sau uo pe le o le taimi lea e lipoti ai. A fai mai loa e tu’u…ia e fa’alogo iai.

O le lipotia o se fa’afitauli

Aua e te mafaufau o tagata taufa’asese o ni tagata mai fafo e te poto atu ai. O le taufa’asese o se pisinisi leaga ae o le pisinisi i nei tagata, ma e matua popoto i le latou galuega leaga. E foliga mai e alolofa, pe matitiva foi. O tagata taufa’asese e popoto tele e talanoa tonu lava i upu o lo’o e fia fa’alogologo atu iai.

Afai e te masalosalo o le tagata o lo’o lua talanoa e taufa’asese, ia taofi le lua feso’ota’iga ma lipoti loa. E le tatau ona e ma e lipoti le tagata lea, aua e le o oe le tagata ua solitulafono. So’o se faiga saua lava e tatau ona lipoti i leoleo.

Evaga i luga o le upega tafailagi e malupuipuia