O ‘QR codes’ e manaia tele e faigofie ai ona fai se mea, ae o lona fa’aaogaina e ono tutupu ai ni mea ia te oe….aemaise lava ona o lona tuatusi (e le pei o le tuatusi e tusi lelei i lalo), e le mafai e mata ona faitau se code pe malamalama iai. O lona uiga e te le iloa po’o le a le nofoaga (website) o lo’o e iai pe a e va’ai i le code.
O mea e ono tutupu
Talu ai e le mafai e mata ona faitau se code ma malamalama iai, e tele le avanoa e ono fa’aseseina ai oe e le au taufa’asese e pei o le fa’atonu o oe i se nofoaga pepelo (fraudulent website). Tusa lava pe sa iai se code sa’o i le fa’asalalauga o se oloa po’o se auaunaga, e mafai lava ona sui e tagata taufa’asese i se mea pepelo.
E ono fa’asino oe i se nofoaga pepelo e te fa’amatu’u atu ai mea e tau ia te oe ma au tupe, pe fa’ava’ai foi oe i ni ata le talafegai, pe fa’aleaga foi faila o lau device.
Ia fa’aaoga malu ia QR codes
- Ia fa’amautinoa o se kamupani e lelei ma iloga e aumai ai ‘apps’ o lo’o e fa’aaogaina.
- I so’o se mea, aemaise lava o nofoaga faitele, ia siaki e le o suiina se code e se tagata (o le fa’ata’ita’iga o le fa’apipi’i o se isi sticker i luga o le code ua iai.)
- Aua ne’i tu’uina mea e patino ia te oe po’o au tupe, i se nofoaga (website) ua fa’asino iai oe e se QR code.
Pe a kopiina ni polokalame mo le puipuia (security software) mo lau telefoni po’o le ma’a, ia filifili se polokalame ua iai se ‘scanner’ i totonu mo le QR code. O nisi polokalame e faitau ai le QR code i nei aso, e mafai ona iloa ai le moni ma le malupuipuia o le nofoaga (website) o lo’o e iai.