O le mea leaga e fa’aaoga foi feso’ota’iga i le upega tafailagi e tagata leaga mo mafua’aga ua ta’ua i luga. O le tele o tagata leaga e lalafi i tua o nei feso’ota’iga ma fai tala e le mafai ona fai pe a feiloa’i ma isi. O tagata saua i luga o le upega tafailagi e tele mea latou te faia ma e le fa’apito a latou sauaga i tagata iloga. O tagata e sauaina e so’o se ituaiga tagata lava, so’o se matua, so’o se tama po’o se teine, so’o se aganu’u, ma e nofo foi i so’o se mea lava.
Sauaga i luga o le upega tafailagi
E mafai ona tupu nei sauaga na o luga o le upega tafailagi, po’o se vaega foi o sauaga faitele. O nei tagata e ono o tagata e te iloaina pe le iloaina foi. E pei lava o isi tagata saua, latou te vala’au i isi e ‘auai i le latou amio. E mafai ona sauaina oe ona o ou manatu e uiga i mea ‘ese’ese, po’o sou ma’i i le mafaufau po’o le tino pe o le leai foi o se mafua’aga. E masani ona latou lafo i tagata imeli taufa’aleaga ma le saua i ta’aloga, text, imeli, o video taufa’amaasiasi i le Youtube, Vimeo, po’o le taufa’afefe e ala i imeli. E atili ona leaga ona o nei ata e fa’asalalau e aunoa ma lau fa’atagaga. O nisi tagata taufa’amata’u e faia a latou itulau i le Facebook mo lea lava mafua’aga. O a’afiaga o lea taufa’amata’u e amata mai i lou le fiafia ai, seia o’o lava i lou matua a’afia lava ma pule ai i lou ola. O mea nei e tutupu i tagata vaivai e le mafai ona latou puipuia i latou.
O MEA E FAI PE AFAI E TE A’AFIA I IA SAUAGA
Ia poloka a latou imeli, ma isi feso’ota’iga i luga o le upega tafailagi.
Ia lipoti tagata nei i tagata e pulea le initaneti,telefoni ma texts (ISP), po’o le fa’aaoga foi o le app. mo feso’ota’iga i luga o le upega tafailagi. Ia mafaufau i le sui o le numera o lau telefoni pe afai e text mai, ma ia ‘aua nei ta’uina i se isi. Ia puipui lelei au upu tatala (passwords) ma ia fa’aaoga nei upu e tatala ai lau telefoni. Aua le tali i le tagata taufa’amata’u, e fiafia tele iai. Talanoa i se isi ma ta’u iai ou atugaluga. Ia teu imeli taufa’afefe e fai ma molimau pe a e lipotiina le taufa’amata’u. Lipoti taufa’amata’u leaga tele e pei o le fasi tagata i leoleo.
O NISI VAEGA MA FAUTUAGA
Bullying UK (vaega o aiga): www.bullying.co.uk/cyberbullying
O le mulimuli i isi i luga o le upega tafailagi
O lenei amio o le feso’ota’i mai pea o se tagata ae e te le o mana’o ai, e masani ona fai e se tagata e te iloaina pe leai foi. E masani ona tatou faitau ai i tagata iloga, ae so’o se isi lava e ono a’afia ai. E tele mafua’aga e fai ai e tagata ia mea e pei o e ua le fiafia ona o se mea na tupu i le taimi ua te’a, po’o se isi sa lua mafuta ae ua i’u leaga, ae o nisi lava tagata e fiafia e fa’afefe so’o se isi. E mafai ona latou va’ava’ai i au feso’ota’iga i le upega tafailagi, o apps. ma ala leo e te fa’aaogaina, o tagata tou te mafuta ma au fuafuaga. E fa’asolosolo malie lava ona ia osofa’ia au feso’ota’iga e iai lau tusitupe ma isi au faila. O lenei sauaga e mafai ona tupu na o le upega tafailagi, pe o se vaega foi o sauaga lautele.
O LE FO’IA O SAUAGA I LUGA O LE UPEGA TAFAILAGI
Ia toe va’ai po’o a mea e fa’atatau ia te oe o i luga o le upega tafailagi ma ia fa’aitiitia. Ia fai ma sui au imeli ma upu tatala ma ia malupuipuia. Ia toe va’ai mea e malupuipuia ai au feso’ota’iga.
Ia ‘alo’alo ’ese ma feso’ota’iga lautele.
Ia fa’afou pea mea uma e puipuia ai lau telefoni ma lau komepiuta ma ia fa’aaoga i taimi uma.
Ia fa’aaoga i taimi uma vaega e puipuia ai lau uaealesi. Aua le lafoina pe talia mea tau ia oe lava ae o fa’aaoga le Wi Fi faitele. Ia fa’aitiitia au mea tau tupe e te fa’asoaina i luga o le upega tafailagi.
PE AFAI O OE O SE TAGATA SAUAINA I LE UPEGA TAFAILAGI
Ia fa’aputuputu molimau ma lipoti i leoleo. Ia lipoti i le ‘Report Abuse’.
Tagata e taufa’aita tagata i luga o le upega tafailagi
O tagata nei e pei lava o e e taufa’amata’u i luga o le upega tafailagi. Latou te fa’aita tagata latou te le iloa. E fa’aita tagata ona o o latou manatu malolosi pe na o le fa’aita lava. O le taufaifai i gagana ma aganu’u, o upu e fai e a’afia ai fa’afafine, tagata e gay, o mea tau polikiki, o mea e tutupu e ta’atele ai tele le ituaiga taufa’amata’u lea, ae e masani foi ona fa’aita oe ona o se ‘au ta’a’alo po’o se fa’aili e te lagolagoina. E masani foi ona fai i tagata e iloga i itu e pei o le foai o tupe mo tagata matitiva, galuega alofa, ma le galue mo le lelei o isi, ma nisi lava mea lelei…e le fiafia iai tagata fa’apea. O se mea e aupito leaga lava o le palalauvale i tagata ua maliliu, aua e le mafai ona tali mai. E matua ita ai tele tagata o aiga ma uo. O nei faiga e mafai ona fai e se to’atasi po’o ni tagata se to’atele foi – ia fa’aita isi tagata.
O MEA E FAI PE A E A’AFIA I AMIOGA IA (TROLLING)
Ia poloka faila o lo’o iai ia vaega. Ia lipoti i le (ISP) o tagata e fa’afoeina telefoni, o nofoaga ma apps. e mafai ona taofia. ‘Aua e te ita pe fa’ailoaina foi lea tulaga, e matua fiafia tele iai le tagata o lo’o faia lea amio.
Talanoa i se isi e te talitonuina ma ta’u iai lou a’afiaga
Ia teu imeli taufa’aita e fai ma molimau pe a e lipotia
Ia lipoti imeli e leaga tele e taufa’aleaga ma taufa’aita
Tagata e siaki oe i taimi uma
O le amio lea e siaki lava oe i taimi uma e ala i le tilotilo i au talanoaga, ata, vitio, o mea e tau ia te oe ma au uo. E mafai foi ona lavea ai po’o a mea na e tusi i faila a isi ma isi mea fa’apena.
O tagata nei, latou te fa’alafi mai ia te oe le latou mea la e fai, e ala i le le vala’aulia o oe, pe fai se tala i le Facebook ma isi feso’ota’iga , ma e le tilotlo foi i lau itulau ‘linked in’ ina ne’i te’i ua lipoti mai ia te oe e le nofoaga (site). Latou te le o solia le tulafono e pei o le mulimuli ia te oe i le upega tafailagi (cyberstalking) ae e le o se mea e lelei.